Home

Lajme

Kastriot Myftaraj – Pse dhe si Blendi Fevziu rrezikon që të humbë shtetësinë amerikane madje të shpallet non grata

No Comments Lajme Opinion

Pse dhe si Blendi Fevziu rrezikon që të humbë shtetësinë amerikane madje të shpallet non grata
Blendi Fevziu, i cili mburret se ka intervistuar të gjithë ambasadorët amerikanë të cilët kanë qenë në Shqipëri që nga viti 1991, këto ditë ka pasur një intervistë shumë të vështirë në ambasadën amerikane në Tiranë, ku i intervistuari ka qenë ai vetë. Blendi Fevziu e ka fituar shtetësinë amerikane nga nëna e tij, e cila e kishte përfituar meqënëse nëna e saj, gjyshja e Fevziut kishte marrë shtetësinë amerikane pasi ishte arratisur me leje nga Shqipëria komuniste.
Intervistimi i Fevziut u zhvillua online, por ndërsa intervistuesi ishte në Washington, Fevzoja ishte në selinë e ambasadës amerikane në Tiranë, një përjashtim që u bë duke pasur parasysh statusin e Fevziut si gazetar i privilegjuar i kësaj ambasade. I pranishëm ishte dhe Guri Lekloti Lekloti i cili është këshilltar i të gjithë ambasadorëve amerikanë në Shqipëri për çështje të gjenealogjive të politikanëve dhe njerëzve për të cilët interesohet ambasada. Guri Lekloti më pas ka treguar se gjatë intervistës Fevzoja përdori një numër të madh pecetash prej letre për të fshirë djersët në kokën e tij të rruar.
Kur intervistuesi i bëri të ditur Fevzos se ndaj tij po bëhej një hetim pasi kishte dyshime të arsyeshme që kishte paraqitur të dhëna të rreme për të marrë shtetësinë amerikane, Fevzoja pa me zemërim Guri Leklotin.
-Të betohem që nuk kam lidhje unë,- tha Guri Lekloti,- Ti Fevzo je përzgjedhur për t’ u pyetur pasi Departamenti i Shtetit ka zbatuar një program të shqyrtimit me metoda të inteligjencës artificiale të përfituesve të shtetësisë amerikane, si pasardhës të shtetasve amerikanë. Rastin tënd e ka veçuar programi i inteligjencës artificiale.
Përmbajtja e intervistës ishte si më poshtë:
-Ju jeni Blendi Fevziu, korrekt?
-Jo, jokorrekt, unë jam Blendi Fevzi, pa “u”.
-Ju keni aplikuar për shtetësinë amerikane me mbiemrin “Fevziu”. Korrekt?
-Korrekt. Por pastaj kam paraqitur një dokument ku thuhej se mbiemri im kishte ndryshuar nga “Fevziu” në “Fevzi”. Ky ndryshim ka ndodhur në ndërkohën mes aplikimit tim dhe marrjes së shtetësisë amerikane.
-Nuk e dinit juve mbiemrin tuaj kur aplikuat?
-E kam ditur por pas aplikimit vendosa ta ndryshoj mbiemrin nga “Fevziu” në “Fevzi” pra të heq gërmën fundore, “u”-në.
-A ka ndonjë arsye të posaçme për këtë gjë, se në Shqipëri është një praktikë që njerëzit me të shkuar kriminale ndryshojnë gërma të emrit apo mbiemrit?
-Unë kam një arsye të kundërt me këtë që thoni juve, nuk dua që të krijohet ndonjë ngatërresë me ndonjë person tjetër që ka emër të ngjashëm. Tani që jemi në kohën e digjitalizimit dhe do të digjitalizohen edhe arkivat sekrete të ish-Sigurimit të Shtetit komunist mund të ndodhë që ndonjë njeri me emër dhe mbiemër të ngjashëm me mua të dalë se ka qenë spiun i Sigurimit të Shtetit komunist me pseudonimin “Korani i Myzeqesë”. Prandaj, me procedurë zyrtare e ndryshova mbiemrin nga “Fevziu” në “Fevzi”.
-Domethënë juve nuk jeni “Korani i Myzeqesë”?
-Jo në Myzeqe nuk ka koranë që është një peshk i rrallë i cili në Shqipëri rritet vetëm në Liqenin e Pogradecit, atje ku është vendlindja e gjyshit tim nga babai. Është e vërtetë se unë kam lindur në Myzeqe, në Lushnjë, por koranët nuk erdhën në Myzeqe me rastin e lindjes sime, duke kaluar nga liqeni në Drinin e Zi, pastaj në Adriatik dhe më pas në Lumin Seman. Korani nuk mbijeton dot në ujëra të kripura.
-Nejse z. Fevzi, të qenët bashkëpunëtor i policisë sekrete komuniste nuk përbën ndalim për të marrë shtetësinë amerikane. Na thoni më mirë se përse juve publikisht keni vazhduar të përdorni mbiemrin “Fevziu”.
-Epo kështu më ka mbetur, njerëzit janë mësuar me të.
-Sipas verifikimeve që kemi bërë për juve z. Fevzi del se jeni djalë i birësuar i Ali Fevziut, dajës së nënës suaj, i cili ka pasur prindër Bajramin dhe Nigjaren, kjo e fundit e lindur Toptani. Aliu ka qenë i pamartuar dhe nuk e ka pasur shtetësinë amerikane. Asnjë nga prindërit e tij nuk ka qenë shtetas amerikan. Korrekt?
-Korrekt
-Tani iu lutem z. Fevzi, të fokusohemi te gjenealogjia juaj që iu legjitimon ose jo për të qenë shtetas amerikan.
-Ok, mund t’ ua vërtetoj që më takon plotësisht. Me siguri është ndonjë ndërhyrje ruse në serverat tuaj që ka ngatërruar diçka. Ju jeni korrekt kur thoni që as babai im birësues, as prindërit e tij nuk kishin shtetësi amerikane, por nëna ime biologjike e përfitoi shtetësinë amerikane për shkak se nëna e saj mori shtetësinë amerikane pas largimit nga Shqipëria.
-Por i birësuari nuk përfiton më nga prindërit biologjikë pas shkëputjes prej tyre, përveçse me testament, dhe shtetësia amerikane nuk jepet me testament, z. Fevzi.
-E kam ditur këtë ligj kur aplikova, ma ka shpjeguar një shqiptaro-amerikan Geri Q. Kokalari. Prandaj, pra se të aplikoja hoqa dorë nga birësimi dhe u riktheva si bir legal i nënës sime biologjike. Kështu u legjitimova për të aplikuar për shtetësinë amerikane.
-Uau! Një rast të tillë nuk e kemi ndeshur kurrë, kjo gjë duhet të ketë shkaktuar hutimin në programin e inteligjencës artificiale!
-Unë mbetem me dyshimin se është bërë një ndërhyrje ruse si atentat kibernetik ndaj personit tim, për shkak se jam i mirënjohur si gazetari më proamerikan në Shqipëri. E kam edhe një dyshim se kush ma ka bërë. Kolegu dhe rivali im Sokol Balla vjet gjatë vizitës së kryeministrit Rama në Moskë doli në fotografi me Sergei Lavrovin, me të cilin u duk të ishte i afërt, pasi Lavrovi bëri shaka me të duke i kërkuar pesë dollarë për foton. Me siguri ka qenë Sokol Balla që I kërkoi Lavrovit të bënte diçka kundër meje. Duhet ta shpallni non grata Sokol Ballën për foton me Lavrovin. Është e turpshme që këtij Ballës që njihet edhe si Kol Ballentajni pasi është alkoolist, i japin intervista ambasadorët amerikanë në Shqipëri, madje edhe ndhmëssekretari i Shtetit Escobar. Mjafton që të vijnë në emisionin tim.
-Vazhdojmë z. Fevzi, nëna juaj, nga martesa e saj ka mbiemrin “Bregasi”. Ne vërtet na intereson vija gjenealogjike nga nëna e saj, prej nga nëna juaj e ka përfituar shtetësinë amerikane, por na intereson edhe vija gjenealogjike atërore e juaja pasi jo rrallë na ka ndodhur që janë shtuar fëmijë në një trung familjar për të përfituar shtetësinë amerikane.
-Në rastin tim çdo gjë është e qartë, ju lutem vazhdoni më pyesni për çfarë të doni. E ndjej detyrim që si shtetas amerikan të jem në rregull me ligjet e atdheut tim të madh përveç atdheut tim të vogël.
-Sipas dokumenteve që na keni paraqitur, nëna juaj Rezana Ypi u martua me Hektor Bregasin dhe nga kjo martesë lindët juve. Korrekt?
-Korrekt
-Rezana ishte vajza e zonjës Alisi Ypi, e lindur “Fevziu”, por në aplikimin tuaj bëhet fjalë për një Iris si nëna e Rezanës.
-Alisi pasi u arratis nga Shqipëria komuniste ndryshoi emrin në “Iris”. Prandaj në aplikimin tonë emri i gjyshes është “Iris”.
-Që të jem krejt i sinqertë, nuk kam parë kurrë një çështje me kaq shumë ndryshime emrash dhe mbiemrash, z. Fevzi!
-Epo unë kam një gjenealogji që degëzohet në disa familje të mëdha aristokratike dhe rrethanat historike i kanë detyruar të parët e mi që të bëjnë ndryshime të tilla.
-Në këtë pikë mua më intereson veç nëse Alisi dhe Irisi janë i njëjti person, z. Fevzi. Dhe këtu ka një dyshim të arsyeshëm se nuk është ashtu siç thoni juve. Nuk më del e dokumentuar që një person i quajtur Alisi Ypi të ketë ndryshuar emrin në “Iris” qoftë në Jugosllavi ku ky person është arratisur, qoftë në SHBA ku ka shkuar më vonë. Me dokumente rezulton që një shtetase shqiptare e arratisur iu ka deklaruar autoriteteve shqiptare se është Iris Ypi dhe me këtë emër ka shkuar më pas në SHBA. Dhe ky person i quajtur Iris Ypi i ka dhënë një deklaratë noteriale nënës suaj ku thotë se është Alisi Ypi e cila është regjistruar me emër të ndryshuar kur ka ikur nga Shqipëria. Pastaj është bërë një gjyq në Shqipëri me të cilin emri i gjyshes suaj nga nëna është ndryshuar nga Alisi në Iris. Korrekt?
-Korrekt! Ku qëndron problemi?
-Problemi është se në praktikën tonë globale ka shumë raste kur në këtë mënyrë janë bërë falsifikime për të përfituar abuzivisht shtetësinë amerikane. A nuk është e arsyeshme që të bëhet pyetja se përse Alisi e shndërruar në Iris nuk rimori emrin e saj të dikurshëm, gjë që do ta kishte zgjidhur dhe problemin e vajzës së saj pra edhe tuajin, por gjeti një zgjidhje kaq të ndërlikuar duke marrë në Shqipëri me gjyq emrin e ri të cilin kishte mbajtur kur kishte ikur jashtë vendit? Këtu lind dyshimi i arsyeshëm se një person i quajtur Iris ka gënjyer që nëna juaj dhe familja e saj e ngushtë të përfitonin shtetësinë amerikane. Është çështje tjetër se përse e ka bërë këtë gjë, për shpërblim apo për arsye tjetër.
-Ju siguroj që e ka bërë se nuk donte të rikthente kujtimet e dhimbshme të së kaluarës së saj. Në Shqipëri njerëzve iu ka mbetur si zakon nga koha e komunizmit që të shpifin shumë për të tjerët. Për gjyshen time thoshin se kishte qenë dëshmitare e rremë në gjyqet e diktaturës komuniste dhe si shpërblim ishte sajuar arratisja e saj nga Sigurimi i Shtetit për ta dërguar me mision në Amerikë. Shpifje të ulëta. Për ne familjet e mëdha historike shpifet shumë.
-Por si shpjegohet z. Fevzi që juve vetë, pasi rimorrët prindësinë biologjike të babait dhe nënës suaj, mbajtët mbiemrin Fevzi dhe nuk rimorët mbiemrin Bregasi?
-Më falni por nuk i keni parë mirë dokumentet e mia, unë rimora ligjërisht prindësinë nga nëna, por jo nga babai. Unë vazhdoja të figuroja si djalë i adoptuar i dajës së nënës sime.
-Më duhet të them z. Fevzi se nuk kam ndeshur kurrë rast kaq të ndërlikuar! Kam një pyetje tjetër. Nëna juaj e kam fituar shtetësinë amerikane nga nëna e saj Nigjare Toptani, e cila ishte e bija e Refik Toptanit, i cili i bie të jetë stërgjyshi juaj, korrekt?
-Korrekt.
-Por juve z. Fevzi keni thënë se keni së paku pesë stërgjyshër me mbiemrin “Toptani”, të cilët nuk kanë lidhje mes tyre në vijë të drejtë. Ju keni thënë se keni stërgjysh Refik Toptanin dhe babain e tij Said Sermedin Toptanin, por gjithashtu keni thënë se keni stërgjyshë edhe Murat Toptanin, i cili ka qenë vëllai i Refikut, pra nuk kanë lidhje në vijë të drejtë gjenealogjike. Por gjithashtu thoni se keni si gjyshin tuaj edhe Abdi Toptanin, i cili ka qenë djali i Adem Toptanit. Madje juve në cilësinë e trashëgimtarit të Esat Toptanit keni autorizuar një studio ligjore amerikane që të zbulojë pasuritë që mund të ketë Esat Toptani nëpër botë. Dhe këtë gjë e keni bërë duke paraqitur një dëshmi trashëgimie që vërteton se gjyshja juaj nga nëna ka qenë vajza e Esat Toptanit.
Fevzoja vështroi përsëri Guri Leklotin, i cili ngriti të dy duart:
-Këtë të Esatit unë nuk e kam ditur!- U shfajësua Guri.
-Çfarë përgjigje keni z. Fevzi?- Pyeti intervistuesi.
-Mund t’ ua shpjegoj, -tha Fevzoja,- gjyshja ime nga nëna, Nigjarja ka qenë vajza e Esat Toptanit të cilën ky ia kishte lënë për ta rritur kushëririt të tij Refikut se donte që një nga fëmijët e tij të rritej në Tiranë, si tiranas. Esati vetë, për shkak të detyrave shtetërore që merrte detyrohej të lëvizte me familjen në anë të ndryshme të Perandorisë Osmane. Refiku e kishte mbajtur Nigjaren si vajzën e tij, por nuk e kishte adoptuar me letra. Atëherë nuk iu kushtohej rëndësi këtyre teknikaliteteve burokratike. Nigjarja doli si nuse nga shtëpia e Refikut dhe unë e quaj atë si gjyshin tim, por Nigjarja ishte vajza biologjike dhe legale e Esatit, i të cilit unë jam nip biologjik dhe legal, pra edhe trashëgimtar i radhës së parë. Prandaj Edi Rama më ngacmon duke më thënë që ta marr unë PD-në sepse më takon pasi selia e kësaj partie është ngritur në një truall që është pronë e Toptanëve, madje pikërisht e Esatit.
-Më falni pak z. Fevzi, po më thonë se kemi një problemin me programin e inteligjencës artificiale, nuk po përgjigjet më, duhet të bëjmë një pushim.
Kur rifilluan intervistuesi pyeti:
-Z. Fevzi, ne kemi të dhëna se juve keni autorizuar edhe një studio ligjore turke për të kërkuar pasuritë që ka pasur ose ka trashëguar në Turqi një person i quajtur Bajram Fevzi Çorbaxhiu, për të cilin thoni se është stërgjyshi juaj. Korrekt?
-Korrekt, unë e kam deklaruar që kam një stërgjysh me emrin Bajram Fevzi, i cili është babai i gjyshes sime, të quajturës Alisi-Iris, që u bë shtetase amerikane.
-Por këtu z. Bajram Fevzi na del me mbiemrin “Çorbaxhi”?!
-Stërgjyshi im e ka shpjeguar këtë çështje në shënimet që ka lënë ai dhe që i kam unë. Në Perandorinë Osmane muslimanët kishin emër të dyfishtë ndërsa mbiemri nuk ishte zyrtar por si i tillë bëhej emri, profesioni ose grada e posti i ndonjë paraardhësi të shquar. Stërgjyshi im kishte dy emra, ose më saktë kishte emër të dyfishtë, Bajram dhe Fevzi. Ashtu si Mustafa Qemali, i njohur si Ataturku, që “Qemal” nuk kishte mbiemrin por emrin e dytë. Mbiemri i stërgjyshit tim ishte “Çorbaxhi” që në hierarkinë ushtarake osmane ishte një gradë e lartë, komandant i një reparti jeniçerësh, i cili kishte detyrë të ndante edhe supën që quhej çorbë, pra ishte edhe kujdestar i kazanit të gjellës. Sot mund të duket si punë e ulët por në atë kohë kishte shumë rëndësi sepse rebelimet brenda ushtrisë në shumë raste nisnin pikërisht për shkak të mosndarjes së drejtë të çorbës. Në këto raste përmbysej kazani prandaj duhej një njeri me autoritet që ta kishte detyrën e çorbaxhiut. Kuptohet që këtë detyrë nuk e kishte pasur Bajrami por një paraardhës i tij se në kohën e Bajramit korpusi i jeniçerëve ishte shpërbërë. Unë ia kam treguar këtë historinë e kazanit të çorbës edhe Edi Ramës dhe ai e përdor duke folur për gazetarinë e kazanit, por nuk e shpjegon historinë e kazanit. Më ka vjedhur idenë, ta keni parasysh që ai më vjedh shumë ide mua. Gjithsesi, unë kam të drejtën e ligjshme të quhem Blendi Çorbaxhiu, por për momentin nuk e kam marrë ligjërisht këtë mbiemër tjetër historik timin, por mbetet trashëgimi e imja familjare.
Në këtë moment Guri Lekloti i ra ballit me pëllëmbë, i habitur në kulm.
Intervistuesi vazhdoi me pyetjet:
-Kemi dhe një dyshim tjetër z. Fevziu, se ka një problem me babain tuaj, atë biologjik, dikur edhe legal, sa i përket mbiemrit të tij.
-Më falni por përse duhet që të pyesni për mbiemrin e babait tim biologjik, kur unë sa i përket atësisë figuroj i birësuar ligjërisht nga daja i nënës por edhe si nip ligjor i një gruaje me shtetësi amerikane, gjyshes sime?
-Sepse edhe me të na del një problem. Babai juaj biologjik, dikur edhe ligjor është Hektor Bregasi, i cili ka lindur si Hektor Starova, i biri i Neki Starovës, i cili nga ana e tij ka lindur si Neki Hysenbegasi. Korrekt?
-Korrekt!
-Përfundimisht sa mbiemra keni juve z. Fevzi dhe cili jeni juve? Se na delni si BLENDI: Fevzi/Fevziu/Bregasi/Starova/Hysenbegasi/Toptani/Çorbaxhiu.
-Ju amerikanët nuk keni aristokraci, por nga historia duhet ta dini se në familjet e mëdha aristokratike si imja kanë shumë mbiemra. E dini juve që Princi Charles, Princi i Walesit, trashëgimtari i fronit britanik ka katër emra dhe tetë mbiemra? Emrat e tij janë Charles Philip Arthur George dhe ai mund të zgjedhë njërin prej tyre kur të bëhet mbret. Nëse unë do të kisha qenë në vend të tij do të kisha zgjedhur një emër që nuk bën pjesë në listën e monarkëve të deritanishëm, pra që të jetë i pari. Se dihet që mbretërit mbajne zyrtarisht emrin pa mbiemër, me numrin përkatës.Si Charles do të jetë i treti, si Philip i dyti, si George i shtati. Si Arthur do të jetë i pari, sepse Mbreti Arthur i Tryezës së Rumbullakët është personazh legjendash dhe nuk llogaritet në listë. Ia kam thënë këtë ide kur e kam takuar në Londër në 2003 kur shoqërova Presidentin Moisiu në vizitën e tij zyrtare. E pyeta për mbiemrat e tij dhe ai më tha se si mbiemra të tij përveç atij të familjes, Windsor mund të quhen edhe toponimet të cilëve iu referohen titujt aristokratikë që ai mban, pra si Princ i Wales, Earl i Chesterit, Dukë i Cornwallit, Dukë i Rothesayt, Earl of Carrick, Baron of Renfrew, Lord i Isles, Great Steward i Scotland. Kështu unë duhej të quhesha:
Blendi Pogradeci Kolonja Korça Tirana Lushnja Toskëria Gegëria Myzeqeja.
-Z. Fevzi, le të fokusohemi në pyetjen time, pra a janë këta që thashë më lart të gjithë mbiemrat tuaj apo ka dhe të tjerë?
Domethënë a jeni juve Blendi Fevzi/Fevziu/Bregasi/Starova/Hysenbegasi/Toptani/Çorbaxhiu apo keni edhe ndonjë mbiemër tjetër?
-T’ iu them të drejtën, -tha Fevzoja, – unë kam arsye të besoj se duhet të kem edhe një mbiemër tjetër, për shkak të të cilit më takon dyfish shtetësia amerikane. Gjyshja ime nga babai Qania, ka thënë se ajo dhe gjyshi im Nekiu kishin vetëm një djalë biologjik ndërsa tjetrin e adoptuan por drejtpërdrejt pa letra, pasi i bënë nder një diplomati të huaj në Shqipëri që ishte mik i familjes dhe kishte pasur në Shqiperi një aventure erotike me një produkt bezdisës për reputacionin dhe karrierën e tij. Ky ishte z. Hugh Grant ministri fuqiplotë amerikan në Shqipëri, domethënë ambasadori siç quhet sot. Pra unë jam nipi i një ambasadori amerikan. Kam ngarkuar një avokat amerikan për të bërë procedurat me pasardhësit e z. Grant për të kryer analizën e ADN. Pastaj mund të marr mbiemrin “Grant” pra të quhem edhe Blendi Grant nëse dua.
-Z. Fevzi më duhet t’ iu them se sipas procedurës standarde zyrtare amerikane kur gjatë intervistimit të aplikuesve del një çështje e tillë si pretendimi i lidhjes gjenealogjike me një ambasador amerikan intervista ndërpritet dhe vazhdon në tjetër linjë. Iu falenderoj për bashkëpunimin./Kastriot Myftaraj

Burimi/Facebook

Leave a Reply

Your email address will not be published. Required fields are marked *